ID Муаллиф Муҳокамага чиқариш санаси Якунланиш санаси Таклифлар сони
1474 Бюро принудительного исполнения при Генеральной прокуратуре Республики Узбекистан 12/12/2018 27/12/2018 0

Муҳокама якунланди

Идораларнинг буйруқ ёки қарори
Электр энергиясини етказиб бериш, транспортировка қилиш, тақсимлаш ва сотишдаги йўқотишларни аниқлаш тартиби тўғрисидаги низомни тасдиқлаш ҳақида
ID-1474

ЎЗБЕКИСТОН РЕСПУБЛИКАСИ ИҚТИСОДИЁТ ВАЗИРЛИГИ

ЎЗБЕКИСТОН РЕСПУБЛИКАСИ МОЛИЯ ВАЗИРЛИГИ

ЭЛЕКТР ЭНЕРГЕТИКАДА НАЗОРАТ БЎЙИЧА

ДАВЛАТ ИНСПЕКЦИЯСИНИНГ

ҚАРОРИ

Электр энергиясини етказиб бериш, транспортировка қилиш,

тақсимлаш ва сотишдаги йўқотишларни аниқлаш тартиби

тўғрисидаги низомни тасдиқлаш ҳақида

           Ўзбекистон Республикаси Президентининг 2017 йил 29 майдаги ПФ-5059-сон “Электр энергияси ва табиий газ етказиб бериш ҳамда истеъмол қилиш соҳасида тўлов интизомини янада мустаҳкамлаш, шунингдек, ижро иши юритиш тизимини тубдан такомиллаштириш чора-тадбирлари тўғрисида”ги Фармонига мувофиқ Ўзбекистон Республикаси Иқтисодиёт вазирлиги, Молия вазирлиги ва Электр энергетикада назорат бўйича давлат инспекцияси қарор қилади:

            1. Электр энергиясини етказиб бериш, транспортировка қилиш, тақсимлаш ва сотишдаги йўқотишларни аниқлаш тартиби тўғрисидаги низом иловага мувофиқ тасдиқлансин.

            2. Мазкур қарор расмий эълон қилинган кундан эътиборан кучга киради.

 

            Иқтисодиёт вазири                                                                                                                                                             Б. Ходжаев

                        Тошкент ш.,

            2018 йил “_____”___________,

                        _____ - сон

            Молия вазири                                                                                                                                                                      Д. Кучкаров

                        Тошкент ш.,

            2018 йил “_____”___________,

                        _____ - сон

            Электр энергетикада назорат бўйича

            давлат инспекцияси бошлиғи                                                                                                                                         Д. Исакулов

                        Тошкент ш.,

            2018 йил “_____”___________,

                        _____ - сон

                                                                                                                                                                                                                                                                                                                Ўзбекистон Республикаси

                                                                                                                                                                                                                                                                                                                   Иқтисодиёт вазирлиги,

                                                                                                                                                                                                                                                                                                                     Молия вазирлиги ва

                                                                                                                                                                                                                                                                                                 “Ўздавэнергоназорат” инспекциясининг

                                                                                                                                                                                                                                                                                                          2018 йил «___» __________ даги

                                                                                                                                                                                                                                                                                                           ______ ва ______ - сон қарорига

                                                                                                                                                                                                                                                                                                                               ИЛОВА

Электр энергиясини етказиб бериш, транспортировка қилиш,

тақсимлаш ва сотишдаги йўқотишларни аниқлаш тартиби тўғрисидаги

НИЗОМ

           Мазкур Низом Ўзбекистон Республикаси Президентининг 2017 йил 29 майдаги ПФ-5059-сон “Электр энергияси ва табиий газ етказиб бериш ҳамда истеъмол қилиш соҳасида тўлов интизомини янада мустаҳкамлаш, шунингдек, ижро иши юритиш тизимини тубдан такомиллаштириш чора-тадбирлари тўғрисида”ги Фармонига мувофиқ “Ўзбекэнерго” акциядорлик жамияти корхоналари томонидан истеъмолчиларга электр энергиясини етказиб бериш, тақсимлаш ва сотишдаги йўқотишларни аниқлаш тартибини белгилайди.

                                                                                                                                                                                1-§. Умумий қоидалар

           1.“Ўзбекэнерго” АЖ ҳар ойда бевосита истеъмолчилар томонидан фойдаланилган электр энергияси ҳажми ва тегишли ҳудудлар чегарасидаги тармоқларга етказиб берилган ҳажм ўртасидаги тафовут мавжудлиги ҳақидаги маълумотларни Ўзбекистон Республикаси Бош прокуратураси ҳузуридаги Мажбурий ижро бюросига (бундан буён матнда Бюро деб юритилади) тақдим этади. Тақдим этилган маълумотлар асосида Бюро ҳудудий электр тармоқлари корхоналари билан биргаликда тафовутнинг вужудга келиш сабабларини аниқлаш бўйича белгиланган тартибда чоралар кўради.

           2. Вазирлар Маҳкамасининг 2018 йил 12 январдаги 22-сон қарори билан тасдиқланган “Электр энергиясидан фойдаланиш қоидалари”нинг 75-бандига асосан, истеъмолчи тармоғининг транзит узатишда қатнашган қисми, электр энергиясини узатишдаги технологик сарфнинг ягона электр энергетикаси тизимига тегишли қисми бўйича “Электр энергиясини электр тармоқлари бўйлаб узатиш ва тақсимлашда технологик йўқотишларнинг нормативларини ҳисоблаш тартиби тўғрисидаги йўриқнома”нинг (рўйҳат рақами 2871, 2017 йил 31 март) 5 - формуласига асосан ҳисобланадиган технологик йўқотишларнинг абсолют миқдорига қўшиб ҳисобланади.

          3. Агар истеъмолчи эгаси бўлмаган ёки эгаси номаълум бўлган ёхуд эгаси эгалик қилишдан воз кечган электр тармоғи ҳўжалиги объекти орқали электр энергияси билан таъминланаётган бўлса, ўзларининг электр тармоқларидан бундай объектлар орқали электр энергиясини етказиб бераётган ҳудудий электр тармоқлари корхоналари улардаги технологик йўқотишларни ўзларига тегишли электр тармоқларидаги технологик йўқотишлардан алоҳида ҳисоблайдилар. Бунда эгаси бўлмаган ёки эгаси номаълум бўлган ёхуд эгаси эгалик қилишдан воз кечган электр тармоғи ҳўжалиги объекти ҳудудий электр тармоқлари корхоналари балансига қабул қилинган ёки қилмаган тақдирда, улардаги технологик йўқотишлар ушбу корхоналарнинг технологик йўқотишларида ҳисобга олинади. Амалга оширилган ҳисоб-китоб миқдорлари технологик йўқотишларнинг абсолют миқдорига қўшиб ҳисобланади.

           4. Электр энергиясини ишлаб чиқарувчи, етказиб берувчи, тақсимловчи ва сотувчи корхоналар ҳар йили 1 сентябргача келгуси йил учун “Электр энергиясини электр тармоқлари бўйлаб узатиш ва тақсимлашда технологик йўқотишларнинг нормативларини ҳисоблаш тартиби тўғрисидаги йўриқнома” (рўйҳат рақами 2871, 2017 йил 31 март) асосида тармоқларидаги электр энергиясини йўқолишларини ҳисоблайдилар ва “Ўзбекэнерго” АЖ га тақдим этадилар. Бунда бирламчи маълумотлар электр энергиясини ишлаб чиқарувчи, етказиб берувчи, тақсимловчи ва сотувчи корхоналар раҳбарлари, бош маҳандислари, бош ҳисобчи ҳамда масъул бўлим бошлиқлари имзолари билан тасдиқланиши лозим.

           5. Электр энергиясини ишлаб чиқарувчи, етказиб берувчи, тақсимловчи ва сотувчи корхоналар томонидан технологик йўқотишлар бўйича амалга оширилган ҳисоб-китоблар “Ўзбекэнерго” АЖнинг тегишли йўналишлари бўйича бошқармалари томонидан кўриб чиқилиб, бошқарув раисининг соҳавий ўринбосарлари томонидан тасдиқланади.

           6. Мазкур Низомга асосан “Ўзбекэнерго” АЖ бўйича (корхоналар кесимида) амалга оширилган технологик йўқотишларнинг ҳисоб-китоблари умумлаштирилган холда “Ўздавэнергоназорат” инспекциясига тақдим этилади. Тақдим этилган технологик йўқотишларнинг ҳисоб-китоблари “Ўздавэнергоназорат” инспекцияси томонидан “Электр энергиясини электр тармоқлари бўйлаб узатиш ва тақсимлашда технологик йўқотишларнинг нормативларини ҳисоблаш тартиби тўғрисидаги йўриқнома”га мувофиқ амалга оширилганлиги кўриб чиқилади ва келишилади.

          7. “Ўзбекэнерго” АЖ ҳар йили корхоналар томонидан ҳисобланган тармоқлардаги электр энергияси йўқотишларини инобатга олган ҳолда электр энергетика объектларининг ички тармоқ электр энергияси истеъмолининг прогнозини шакллантиради, ҳамда ўрнатилган тартибда Ўзбекистон Республикаси Иқтисодиёт вазирлигига тақдим этади.

        8. “Ўзбекэнерго” АЖ Ўзбекистон Республикаси Вазирлар Маҳкамаси томонидан тасдиқланган электр энергияси ишлаб чиқариш ва истеъмол қилиш балансини корхоналар кесимида тармоқлардаги электр энергияси йўқотишларнинг меъёрий миқдорини корхоналарга етказади.

         9. “Ўзбекэнерго” АЖ электр энергиясини ишлаб чиқариш, транспортировка қилиш ва етказиб беришнинг ҳақиқий режимидан келиб чиққан ҳолда, ҳар чорак якунида корхоналар томонидан қайта ҳисобланган электр тармоқлардаги йўқотишлар асосида меъёрий миқдорларга ўзгартиришлар киритиш юзасидан Ўзбекистон Республикаси Иқтисодиёт вазирлиги таклиф киритади.

                                                                                                                                                                     2-§.  Тафовут мавжудлигини аниқлаш тартиби

           10. Ҳисобот давридан кейинги ойнинг биринчи санасида, ҳудудий электр тармоқлари корхоналари, туман (шаҳар) электр таъминоти корхоналарининг шунингдек, Мажбурий ижро бюросининг ҳудудий бошқармалари ва туман (шаҳар) бўлимларининг масъул ходимлари иштирокида соат 4-00 да мансублик чегарасида ўрнатилган электр энергиясини ҳисобга олиш приборларининг кўрсаткичларини қайд этилади ва тегишли далолатнома асосида расмийлаштирилади.

           11. Ҳудудлар чегарасидаги тармоқларга етказиб берилган электр энергияси ҳажми (Wҳээ), кўрсаткичларни расмийлаштириш далолатномаси бўйича, электр энергияси оқимини аниқлаш методикаларига асосан аниқланади.

           12. Истеъмолчилар томонидан фойдаланилган электр энергияси ҳажмини (Wиээ) аниқлаш:

           а) Бюронинг туман (шаҳар) бўлимлари масъул ходимлари, ҳисобот даври учун истеъмолчиларнинг ҳисобга олиш приборлари кўрсаткичларини олади ва биллинг (“Электрҳисоб” комплекс дастури) дастурига киритади;

           б) электр тармоқлари корхонасининг масъул ҳодимлари олинган кўрсаткичлар асосида юридик истеъмолчилар бўйича фойдаланилган электр энергия миқдорини аниқлайди;

           в) электр тармоқ корхонасининг масъул ҳодимлари истеъмолчилар томонидан фойдаланилган электр энергияси ҳажмини (Wиээ) биллинг дастурида шакллантирилган юридик ва маиший истеъмолчиларга ҳисобланган умумий миқдор асосида аниқлайди.

           13. Электр энергиясини тармоқлардаги технологик йўқотиш миқдорлари “Электр энергиясини электр тармоқлари бўйлаб узатиш в тақсимлашда технологик йўқотишларнинг нормативларини ҳисоблаш тартиби тўғрисидаги йўриқнома” (рўйҳат рақами 2871, 2017 йил 31 март) асосида аниқланади (Wйээ).

           14. Тафовут миқдори (Wт) қуйидаги формула бўйича аниқланади:

                                                       Wт=Wҳээ - Wиээ - Wйээ                        (1)

           Бунда:

           Wҳээ - ҳудудлар чегарасидаги тармоқларга етказиб берилган электр энергияси ҳажми;

           Wиээ - истеъмолчилар томонидан фойдаланилган электр энергияси ҳажми;

           Wйээ - тармоқлардаги технологик йўқотиш миқдори.

           15. Электр тармоқлари корхоналари ҳисобот ойидан кейинги ойнинг ўн бешинчи санасига қадар тафовутлар мавжудлигини аниқлайди.

                                                                                                                                                                     3-§.  Тафовутни бартараф этиш

           16. Ҳудудларда тафовут аниқланган тақдирда, Бюронинг туман (шаҳар) бўлимлари ва электр тармоқлари корхоналари бу хақида далолатнома расмийлаштиради.

           17. Тафовутни бартараф этиш юзасидан Бюро ва электр тармоқ корхоналари ходимлари ўзига юклатилган вазифалар асосида қуйидаги чора-тадбирларни амалга

оширади:

           а) истеъмолчилар билан, биллинг дастурига киритилган кўрсаткичлар асосида тўлиқ ҳисоб-китобни амалга ошириш;

           б) истеъмолчилар билан ҳақиқий кўрсаткичлар асосида ҳисоб-китоб қилиш ва амалдаги тарифлар тўғри қўлланилишини доимий назорат қилиш;

           в) амалга оширилган ҳисоб-китоблар асосида юридик истеъмолчиларга тўлов талабномалари юбориш;

           г) истеъмолчиларнинг ҳисобга олиш приборлари, кучланиш, ток трансформаторлари алмаштирилган тақдирда бу хақдаги маълумотларни ўз вақтида биллинг дастурига киритиб бориш;

           д) электр тармоғига ноқонуний уланиш, талон-торож ҳолатларини аниқлаш, бартараф этиш ва олдини олиш;

           е) тегишли ҳудудлар чегарасидаги, истеъмолчилардаги ҳисобга олиш приборлари, ўлчов трансформаторлари созлигини ҳамда уланиш тизимларининг тўғрилигини доимий назорат қилиб боради;

      ж) тегишли ҳудудлар чегарасидаги, истеъмолчилардаги ҳисобга олиш приборлари, ўлчов трансформаторлари ва уларнинг иккиламчи занжирларининг аниқлик даражасини амалдаги меъёрларга тўғри келишини ўрганиш, меъёрларга тўғри келмаган тақдирда бартараф эитиш бўйича чоралар кўриш;

           з) электр тармоқлардаги электр энергиясининг йўқолишларини рухсат этилган меъёр даражасидан ортиб кетиши ҳолатларини аниқлаш ва уларни бартараф қилиш;

           и) электр энергияси йўқолишларини қисқартириш юзасидан ташкилий-техник тадбирларни амалга ошириш.

                                                                                                                                         4-§. Тавофутни бухгалтерия ҳисоботларида акс эттириш

           18. Ҳар бир ҳисобот йилининг якуни бўйича “Ўзбекэнерго”АЖнинг ҳудудий электр тармоқлари корхоналари электр энергияси балансида юзага келган тафовутлар бўйича қонун ҳужжатларида белгиланган тартибда тегишли қарорлар қабул қилади.

           19. Тафовут “Электр энергиясини сотишни бухгалтерия ҳисобида акс эттириш тартиби тўғрисидаги низом” (рўйхат рақами 2127, 2010 йил 31 июль) асосида ҳисоботларда акс эттирилади.

                                                                                                                                                                     4-§. Якуний қоидалар

           20. Мазкур Низомга риоя қилиниши учун жавобгарлик “Ўзбекэнерго” АЖ, унинг корхоналари, Мажбурий ижро бюроси, унинг ҳудудий бошқарма, туман (шаҳар) бўлимларининг раҳбарлари зиммасига юклатилади.

           21. Мазкур Низом Ўзбекистон Республикаси Бош прокуратураси ҳузуридаги Мажбурий ижро бюроси ва “Ўзбекэнерго” акциядорлик жамияти билан келишилган.

           “Ўзбекэнерго” АЖ

           бошқаруви раиси                                                                                                                                                                                                                  У. Мустафоев

           2018 йил “_____”__________

           Ўзбекистон Республикаси

           Бош прокуратураси ҳузуридаги

           Мажбурий ижро бюроси директори                                                                                                                                                                                 Б. Кудратходжаев

           2018 йил “_____”__________

Умумий таклифлар

919