Davlat tilida bo'lmagan loyihalar portal ma'muriyati tomonidan loyiha muallifini ogohlantirmasdan o'chiriladi
ID Muallif Muhokamaga chiqarish sanasi Yakunlanish sanasi Takliflar soni
18612 Sog’liqni saqlash vazirligi huzuridagi Farmatsevtika tarmog’ini rivojlantirish agentligi 07/06/2020 22/06/2020 11

Muhokama yakunlandi

Oʻzbekiston Respublikasi Qonuni
Дори воситалари, тиббий буюмлар ва фармацевтика фаолияти тўғрисида
ID-18612

Ўзбекистон Республикасининг Қонуни

Дори воситалари, тиббий буюмлар ва фармацевтика фаолияти тўғрисида

(янги таҳрири)

1-боб. Умумий қоидалар

1-модда. Ушбу Қонуннинг мақсади

Ушбу Қонуннинг мақсади дори воситалари, тиббий буюмлар ва фармацевтика фаолияти соҳасидаги муносабатларни тартибга солишдан иборат.

2-модда. Дори воситалари, тиббий буюмлар ва фармацевтика фаолияти тўғрисидаги қонун ҳужжатлари

Дори воситалари, тиббий буюмлар ва фармацевтика фаолияти тўғрисидаги қонун ҳужжатлари ушбу Қонун ва бошқа қонун ҳужжатларидан иборатдир.

Агар Ўзбекистон Республикасининг халқаро шартномасида Ўзбекистон Республикасининг дори воситалари, тиббий буюмлар ва фармацевтика фаолияти тўғрисидаги қонун ҳужжатларида назарда тутилганидан бошқача қоидалар белгиланган бўлса, халқаро шартнома қоидалари қўлланилади.

3-модда. Асосий тушунчалар

Ушбу Қонунда қуйидаги асосий тушунчалар қўлланилади:

дори воситалари — касалликлар профилактикаси, уларга ташхис қўйиш ва уларни даволаш, шунингдек одам организмининг ҳолати ва функцияларини ўзгартириш учун қўлланиладиган дори препаратлари ва фармацевтик субстанциялар;

фармацевтик субстанциялар - келиб чиқишидан қатъи назар дори препаратларини ишлаб чиқариш ва тайёрлаш учун қўлланиладиган дори воситалари;

дори препаратлари — дозаланган, идишга жойланган-ўралган, қўлланилиш учун тайёр дори воситалари;

доривор ўсимлик хом ашёси — дори воситаларини ишлаб чиқариш ва тайёрлаш учун фойдаланиладиган, таркибида биологик фаол моддалар бўлган ўсимликлар ёки уларнинг қисмлари;

дори препаратининг хавфсизлиги дори препаратини ташиш, сақлаш, тиббий қўллаш талабларига риоя қилган ҳолда етарли исботловчи база асосида одам соғлиғига зиён ва/ёки зарар етказиш мумкин бўлган ҳолатлар йўл қўйилмайдиган, хавфни олдини олувчи дори препаратининг тавсифи.

дори препаратининг самарадорлиги бу профилактика, диагностика ёки терапевтик таъсирга ёки инсон организмини физиологик функцияларини тиклаш, тузатиш ёки ўзгартиришга имкон берадиган дори прерапатининг хусусиятлари йиғиндисидир.

рецепт — шифокорнинг фармацевтик маълумотга эга бўлган мутахассисга дори препаратини тайёрлаш ва (ёки) бериш ҳамда унинг қўлланилиш усули тўғрисидаги ёзма кўрсатмаси;

сифатсиз дори воситаси ва тиббий буюм — яроқсиз ҳолга келган ва (ёки) яроқлилик муддати ўтган дори воситаси ва тиббий буюм;

тиббий буюмлар — алоҳида ёки биргаликда тиббий мақсадларда қўлланиладиган, одам организми ва аъзоларини, тўқима қисмларини алмаштириш ва модификациялаш, бузилган ва йўқолган физиологик вазифаларини қайта тиклаш, урчишни назорат қилиш ёки касалликлар профилактикаси, уларга ташхис қўйиш ва уларни даволаш, реабилитация ва тиббий муолажаларни ўтказиш учун, шунингдек одам организмининг ҳолати ва функцияларини аниқлаш ҳамда ўзгартириш учун тиббиёт амалиётида қўлланилишига рухсат этилган, қўлланилиши натижасида одам организмига бевосита фармакологик, иммунологик ёки метаболик таъсир кўрсатмайдиган аппаратлар, ускуналар, асбоблар, қурилмалар ва мажмуалар, жиҳозлар; боғлов ва ўров воситалари, стоматологик материаллар, реагентлар тўпламлари, назорат материаллари, полимер, резина ва бошқа материаллардир;

фармацевтика фаолияти — дори воситалари ва тиббий буюмлар яратиш бўйича илмий-тадқиқот ишларини, шунингдек уларни ишлаб чиқариш, тайёрлаш, уларнинг сифатини назорат қилиш ҳамда уларни реализация қилишни қамраб оладиган фаолият;

тадқиқот субъекти синов ўтказилаётган дори препаратини қабул қилувчи клиник синовда иштирок этадиган гуруҳ аъзоси ёки назорат гуруҳининг  таркибидаги жисмоний шахс.

дори воситалари муомаласи дори воситаларини яратиш, клиник олди ва клиник тадқиқотлар, экспертиза, рўйхатдан ўтказиш, фармакологик назорат, стандартизация, сифат назорати, ишлаб чиқариш, тайёрлаш, сақлаш, ташиш, олиб кириш ва олиб чиқиш, сотиш, қўллаш, қайтариш, реклама қилиш, йўқ қилиш;

дори воситалари ва тиббий буюмларни ишлаб чиқарувчи ўрнатилган тартибда дори воситалари ва тиббий буюмларни ишлаб чиқарувчи ташкилот;

зарур фармацевтика амалиётлари (GxP) дори воситаларини истемолчи учун сифати, самарадорлиги ва хавфсизлигини таъминловчи зарур ишлаб чиқариш амалиёти (GMP), зарур дистрибьютерлик амалиёти (GDP), зарур клиника амалиёти (GCP), зарур лаборатория амалиёти (GLP), зарур фармакологик назорати амалиёти (GVP), зарур сақлаш амалиёти (GSP), зарур дорихона амалиёти (GPP) талаблари мажмуаси;

фармацевтик инспекция юридик шахсларни зарур фармацевтика амалиётлари талабларига мувофиқлигини баҳолаш юзасидан ўтказиладиган инспекция;

фармацевтик инспектор — фармацевтик инспекцияни ўтказиш учун ваколатга эга фармацевтик инспекторлар реестрига киритилган мутахассис;

фармацевтик инспекторлар реестри фармацевтик инспекцияни ўтказиш учун ваколатга эга фармацевтик инспекторлар хақидаги маълумотлар сақланадиган маълумотлар базаси;

Ўзбекистон Республикасида рўйхатдан ўтказилган дори воситаларининг ғайриқонуний нусхалари — интеллектуал мулк тўғрисидаги қонун ҳужжатлари бузилган ҳолда муомалага киритилган дори воситалари;

қалбакилаштирилган дори воситаси ва тиббий буюм — таркиби ёки хусусияти тўғрисида ёхуд ишлаб чиқарувчиси ҳақида ёлғон ахборот илова қилинган дори воситаси ва тиббий буюм.

4-модда. Давлатнинг аҳолини асосий дори воситалари ва тиббий буюмлар билан таъминлаш соҳасидаги кафолатлари

Давлат асосий дори воситалари, шунингдек тиббий буюмлар олиниши имкониятини ва уларнинг сифатини, хавфсизлигини ва самарадорлигини  кафолатлайди.

2-боб. Давлат органларининг дори воситалари, тиббий буюмлар ва фармацевтика фаолияти соҳасидаги ваколатлари

5-модда. Ўзбекистон Республикаси Вазирлар Маҳкамасининг дори воситалари, тиббий буюмлар ва фармацевтика фаолияти соҳасидаги ваколатлари

Ўзбекистон Республикаси Вазирлар Маҳкамаси:

дори воситалари, тиббий буюмлар ва фармацевтика фаолияти соҳасида ягона давлат сиёсати амалга оширилишини таъминлайди;

дори воситалари, тиббий буюмлар ва фармацевтика фаолияти соҳасидаги давлат дастурларини тасдиқлайди ҳамда уларнинг бажарилиши устидан назоратни амалга оширади;

давлат ва хўжалик бошқаруви органларининг дори воситалари, тиббий буюмлар ҳамда фармацевтика фаолияти соҳасидаги фаолиятини мувофиқлаштириб боради;

дори воситаларини ва тиббий буюмларни давлат рўйхатидан ўтказиш тартибини белгилайди;

Зарур амалиётлар (GxP) талабларига мувофиқлик юзасидан инспекциялар ўтказиш тартибини белгилайди;

Ўзбекистон Республикаси Вазирлар Маҳкамаси қонун ҳужжатларига мувофиқ бошқа ваколатларни ҳам амалга ошириши мумкин.

6-модда. Ўзбекистон Республикаси Соғлиқни сақлаш вазирлигининг дори воситалари, тиббий буюмлар ва фармацевтика фаолияти соҳасидаги ваколатлари

Ўзбекистон Республикаси Соғлиқни сақлаш вазирлиги:

дори воситалари, тиббий буюмлар ва фармацевтика фаолияти соҳасидаги давлат дастурларини ишлаб чиқиш ҳамда амалга оширишда иштирок этади;

Асосий дори воситалари рўйхатидаги дори воситаларининг, шунингдек тиббий буюмларнинг давлат буюртмасини шакллантиради ва уларнинг давлат тиббиёт муассасаларида мавжуд бўлиши устидан назоратни таъминлайди;

айрим тоифадаги шахсларга дори воситаларининг Ўзбекистон Республикаси Вазирлар Маҳкамаси томонидан белгиланадиган тартибда имтиёзли берилишини таъминлайди;

тиббиёт амалиётида қўлланилишига рухсат этилган гиёҳвандлик воситалари, психотроп моддалар ва прекурсорларни реализация қилиш, бериш, тақсимлаш, сақлаш ҳамда ҳисобга олиш тартибини белгилайди;

кам учрайдиган касалликларни даволаш учун мўлжалланган Орфан дори препаратлари ва тиббий буюмларни рўйхатини ишлаб чиқади ва тасдиқлайди;

рецептсиз бериладиган дори воситалари рўйхатини йилига камида бир марта тасдиқлайди;

Асосий дори воситалари рўйхатини икки йилда камида бир марта ишлаб чиқади ва тасдиқлайди;

даволаш-профилактика муассаларида дори препаратлари ва тибиий буюмлар билан таъминлаш сохасида ягона давлат сиёсатини олиб боради;

одамда дори препаратини клиник тадқиқотларини ўтказиш тартибини тасдиқлайди;

клиник тадқиқотлар ўтказиладиган клиник базалар рўйхатини тасдиқлайди;

клиник тадқиқотлар ўтказилиши учун маъсул бўлган тиббиёт ходимларини фаолиятини мувофиқлаштиради;

дори препаратини клиник тадқиқотида иштирок этаётган тадқиқот субъекти хаётига ва соғлиқига ёки жамиятга таҳдид солинса, клиник тадқиқотларни тўхтатиш, давом эттириш ёки тугатиш тўғрисида қарор қабул қилади.

Ўзбекистон Республикаси Соғлиқни сақлаш вазирлиги қонун ҳужжатларига мувофиқ бошқа ваколатларни ҳам амалга ошириши мумкин.

7-модда. Соғлиқни сақлаш вазирлиги ҳузуридаги Фармацевтика тармоғини ривожлантириш агентлигининг дори воситалари, тиббий буюмлар ва фармацевтика фаолияти соҳасидаги ваколатлари:

дори воситалари, тиббий буюмлар ва фармацевтика фаолияти соҳасидаги давлат дастурларини ишлаб чиқиш ҳамда амалга оширишда иштирок этади;

дори воситалари ва тиббий буюмлар соҳасидаги норматив-ҳуқуқий ҳужжатларни, техник жиҳатдан тартибга солиш соҳасидаги норматив ҳужжатларни тасдиқлайди;

Давлат фармакопеясини тасдиқлайди ва чоп этади;

фармацевтика фаолиятини лицензиялашни белгиланган тартибда амалга оширади ва лицензия талаб ва шартларига риоя эилишини назорат қилади;

Зарур фармацевтика амалиётлари (GxP) талабларига мувофиқлик бўйича инспекцияни амалга оширади;

дори воситалари ва тиббий буюмларни сертификатлаштириш органлари фаолиятини, шунингдек синов лабораторияларини фаолиятини мувофиқлаштиради ва назорат қилади;

дори воситалари ва тиббий буюмларни клиник олди (клиник бўлмаган) ва клиник тадқиқотлар натижаларини экспертизадан ўтказади;

дори воситалари ва тиббий буюмларни экспертизасини, давлат рўйхатидан ўтказилишини, сифати назорат қилинишини, стандартлаштирилишини ва сертификатлаштирилишини белгиланган тартибда амалга оширади;

фармакологик назоратни амалга оширади;

тиббий буюмлар рўйхатини тасдиқлайди;

тиббиёт амалиётида қўлланилишига рухсат этилган дори воситалари ва тиббий буюмлар давлат реестрини юритади ҳамда ўзининг расмий сайтида эълон қилади;

фармацевтика инспекторлар фаолиятини мувофиқлаштиради ва реестрини юритади;

дори воситалари ва тиббий буюмларнинг зарарли таъсирини тасдиқловчи фактлар мавжуд бўлган тақдирда уларнинг ишлаб чиқарилишини, тайёрланишини, импорт қилинишини, реализация қилинишини тўхтатиб туради. Тадбиркорлик субъектларининг фаолиятини тўхтатиб туришга олиб келадиган дори воситаларининг, тиббий буюмларнинг ишлаб чиқарилишини ва тайёрланишини тўхтатиб туриш (фавқулодда вазиятлар, эпидемиялар ҳамда аҳолининг ҳаёти ва соғлиғи учун бошқа ҳақиқий таҳдид юзага келишининг олдини олиш муносабати билан дори воситалари ва тиббий буюмлар ишлаб чиқарилишини ҳамда тайёрланишини ўн иш кунидан кўп бўлмаган муддатга тўхтатиб туриш ҳоллари бундан мустасно) суд тартибида амалга оширилади;

фармацевтика тармоғи учун мутахассисларини тайёрлаш, қайта тайёрлаш, аттестациясидан ўтказиш ва мутахассислар маълумотлар базасини яратиш.

Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш Агентлиги қонун ҳужжатларига мувофиқ бошқа ваколатларни ҳам амалга ошириши мумкин.

8-модда. Маҳаллий давлат ҳокимияти органларининг дори воситалари, тиббий буюмлар ва фармацевтика фаолияти соҳасидаги ваколатлари

Маҳаллий давлат ҳокимияти органлари:

дори воситалари, тиббий буюмлар ва фармацевтика фаолияти соҳасидаги инвестициялар ва экспортни ривожлантириш давлат дастурларини амалга оширишда иштирок этади;

дори воситалари, тиббий буюмлар ва фармацевтика фаолияти соҳасидаги ҳудудий дастурларни тасдиқлайди ҳамда амалга оширади;

тегишли ҳудудда давлат даволаш-профилактика муассасаларини ва аҳолини дори воситалари, тиббий буюмлар билан таъминлашда иштирок этади;

дори воситалари, тиббий буюмлар муомаласи ва фармацевтика фаолияти масалалари бўйича аҳоли ўртасида ахборот-тушунтириш ишларини ташкил этиш ҳамда ўтказишда иштирок этади.

Маҳаллий давлат ҳокимияти органлари қонун ҳужжатларига мувофиқ бошқа ваколатларни ҳам амалга ошириши мумкин.

3-боб. Дори воситалари. Тиббий буюмлар.

9 8-модда. Давлат фармакопеяси

Давлат фармакопеяси дори воситаларига ва тиббий буюмларга доир талабларни, умумий фармакопея мақолаларини, фармакопея мақолаларини, дори воситаларининг ва тиббий буюмларнинг сифатини назорат қилиш усулларини ўз ичига олган ҳужжатлар тўплами бўлган расмий нашрдир.

Умумий фармакопея мақоласи дори воситаларининг, тиббий буюмларнинг сифатига, доривор ўсимлик хом ашёсига, уларнинг сифатини назорат қилиш усулларига, дори воситаларининг сифатини назорат қилишда фойдаланиладиган стандарт намуналарга, реактивларга, дори воситаларини ишлаб чиқаришда фойдаланиладиган жойлаш-ўраш материалларига қўйиладиган умумий талабларни белгилайди.

Фармакопея мақоласи муайян дори воситасининг, тиббий буюмнинг, доривор ўсимлик хом ашёсининг, ёрдамчи модданинг сифатига доир талабларни белгилайди.

Умумий фармакопея мақолаларини, фармакопея мақолаларини ишлаб чиқиш ва уларни Давлат фармакопеясига киритиш Фармакопея қўмитаси томонидан белгиланган тартибда амалга оширилади. Фармакопея қўмитаси Ўзбекистон Республикаси Соғлиқни сақлаш вазирлигининг расмий эксперт органидир.

Давлат фармакопеяси Ўзбекистон Республикаси Соғлиқни сақлаш вазирлиги томонидан беш йилда камида бир марта чоп этилади. Давлат фармакопеясининг қайта нашрлари оралиғидаги даврда Давлат фармакопеясига иловалар чоп этилади.

10-модда. Дори воситаларининг ёхуд тиббий буюмларнинг клиник олди тадқиқотлари

Дори воситаларининг клиник олди тадқиқотлари дори воситаларининг  хавфсизлиги ва самарадорлигини ўрганиш мақсадидаги кимёвий, физик, биологик, микробиологик, фармакологик, токсикологик тадқиқотларни хамда одамларда ўтказилиши кўзда тутилмайдиган бошқа тадқиқотларни назарда тутади.

Тиббий буюмларнинг клиник олди тадқиқотлари тиббий буюмларнинг хавфсизлигини ўрганиш мақсадидаги кимёвий, физик, техник, биологик, микробиологик, токсикологик тадқиқотларни ва бошқа тадқиқотларни назарда тутади.

            Дори воситаларининг ва тиббий буюмларнинг клиник олди тадқиқотларини ташкил этиш ва ўтказиш тартиби уларни ишлаб чиқувчилар ва ишлаб чиқарувчилар томонидан ваколатли органлар томонидан тасдиқланган зарур лаборатория амалиётида (GLP) талабларига риоя қилган холда, зарур моддий-техника базасига ва тадқиқотнинг тегишли соҳаси бўйича амалга ошириш ваколатига эга ташкилотларда қонунчиликда белгиланган тартибда ўтказилиши мумкин.

11-модда. Дори препаратларининг клиник тадқиқотлари

Дори препаратининг клиник тадқиқотлари хавфсизлик ва самарадорликни аниқлаш мақсадида уларнинг фармакологик хоссаларини, ножўя таъсирлари ва бошқа дори воситалари ва (ёки) озиқ-овқат махсулотлари билан билан ўзаро таъсири самараси тўғрисидаги маълумотларни ўрганиш учун ўтказилади.

Дори препаратининг клиник тадқиқотлари зарур клиника амалиёти (GCP) талаблари асосида тегишли йўналиш бўйича клиник тадқиқотларни ўтказиш учун зарур инфратузилма, малака ва ваколатига клиник базаларда ўтказилади.

Дори препаратларининг клиник тадқиқотлари халқаро кўп марказли, кўп марказли, давлат рўйхатидан ўтказилгандан кейинги тадқиқотлар, битта ёки биттадан ортиқ даволаш-профилактика муассасасида ягона баённома бўйича зарур клиника амалиёти (GСP) талабларига мувофиқ ўтказилади.

Клиник тадқиқотлар ўтказиладиган даволаш-профилактика муассасалари рўйхати Ўзбекистон Республикаси Соғлиқни сақлаш вазирлиги томонидан тасдиқланади ва ўзининг расмий  сайтида жойлаштирилади.

Дори препаратини клиник тадқиқотларини ўтказиш тўғрисида қарор қабул қилиш учун қуйидагилар асос бўлади:

дори препаратининг хавфсизлиги ва самарадорлиги бўйича клиник олди  тадқиқотлар ижобий натижалари;

Дори препаратининг клиник тадқиқотларини ўтказишга тадқиқот субъектининг хавфсизлик ва осойишталигига қўйиладиган талабларни хисобга олган ва риоя қилган холда этика экспертизасининг мазкур тадқиқотларни ўтказиш этика жиҳатидан асосланганлиги тўғрисидаги хулосасисиз йўл қўйилмайди.

Тадқиқот субъектлари сифатида қуйидагиларни иштирокида дори препаратларининг клиник тадқиқотларини ўтказиш таъқиқланади:

етим болалар ва ота-она қарамоғисиз қолган болалар;

ҳомиладорлик давридаги аёллар, кўкрак сути билан боқиш давридаги аёллар, агар улар учун мўлжалланган дори препаратларининг тегишли клиник тадқиқотлари бўйича маълумот олиш учун клиник тадқиқотлар давомида ҳомиладорлик давридаги аёллар, кўкрак сути билан боқиш давридаги аёллар ҳомила ёки чақалоққа зарар етказиш хавфи мавжуд бўлмаганда;

ҳарбийларда, ҳарбий харакатлар даврида қўллаш учун махсус ишлаб чиқилганда, фавқулодда вазиятларда, зарарли кимёвий, биологик, радиацион омилларнинг таъсири натижасида келиб чиқадиган касалликлар ва жароҳатларнинг олдини олиш ва даволашда фойдаланиш учун.. Бунақа дори препаратларининг клиник тадқиқотларида тадқиқот субъекти сифатида харбийлар, тезкор харбий хизмат ўтаётган ҳарбийлар бундан мустасно, ушбу қонунда фуқаролар учун белгиланган талабларга мувофиқ;

хуқуқни муҳофаза қилиш органлари ходимлари;

озодликдан маҳрум этиш жойларида жазони ўтаётган шахслар, шунингдек тергов ҳибсхоналарида сақланаётган шахслар.

Беморни тиббиёт амалиётида қўлланиладиган тиббий маҳсулотнинг клиник тадқиқотларида иштирок этиши ихтиёрий равишда унинг ёзма розилиги билан амалга оширилади.

Клиник тадқиқот раҳбари беморга ушбу усулнинг аҳамияти, ушбу тадқиқотнинг табиати ва мумкин бўлган хавфи тўғрисида батафсил тушунтириш бериши шарт.

Бемор ёки унинг қонуний вакили тадқиқотнинг ҳар қандай босқичида унда қатнашишдан бош тортиш ҳуқуқига ега. Соғлом кўнгиллилар учун тиббиёт амалиётида қўлланиладиган дори препаратларининг хавфсизлигини ва (ёки) соғлом кўнгиллилар томонидан ўзлаштирилишини белгилаш; Ўзбекистон Республикасидан ташқарида ишлаб чиқарилган дори препаратлари бўйича ўтказиладиган тадқиқотлар бундан мустасно.

Клиник тадқиқотларни ўтказиш агар вояга етмаганларнинг соғлиғини яхшилаш ёки болалар юқумли касалликларини олдини олиш зарурати туғилганда ёки балоғатга етмаган беморларни даволаш учун тиббиёт амалиётида қўлланиладиган дори препаратининг энг мақбул дозалари тўғрисида маълумот олиш зарур бўлса, клиник тадқиқотларда қатнашадиган балоғатга етмаган беморларни потенциал бемор деб ҳисоблаш мумкин. Бундай ҳолларда, агар тиббиёт амалиётида қўлланиладиган клиник тадқиқот ўтказилаётган дори препарати фақат вояга етмаган беморларга мўлжалланган бўлса, олдин катта ёшдаги беморларда клиник тадқиқотлар ўтказилиши керак.

Тиббиёт амалиётида қўлланиладиган дори препаратининг вояга етмаган ёки муомалага лаёқатсиз бемор иштирокида ўтказилган тақдирда тадқиқот бошланишидан олдин уларнинг ота-оналари ёки бошқа қонуний вакилларидан ёзма розилик олиниши шарт.

Тиббиёт амалиётида қўлланиладиган руҳий касалликларни даволаш учун мўлжалланган дори препаратларининг клиник тадқиқотлари Ўзбекистон Республикаси қонун ҳужжатларида белгиланган тартибда юридик жиҳатдан муомалага лаёқатсиз деб топилган руҳий касалликлари бўлган беморларнинг иштирокида ўтказишга рухсат этилади. Ушбу ҳолатда препаратни клиник тадқиқотлари мазкур беморларнинг қонуний вакилларининг ёзма розилиги билан амалга оширилади.

Тиббиёт амалиётида қўлланиладиган дори препаратларининг клиник тадқиқотлари даврида беморлардан биологик материалларни (биологик суюқлик намуналари, тўқималар, ажралмалар ва одам ҳаёти фаолиятидаги чиқиндиларидан олинган маҳсулотлар намуналари, физиологик ва патологик ажралмалар, суртмалар, қириндилар, ювилмалар, микроорганизмлар, биопсия материаллари) Ўзбекистон Республикасидан ташқарида ўрганиш учун олиб кириш ва обчиқиб кетишга Соғлиқни сақлаш вазирлиги томонидан белгиланган тартибда рухсат берилади. 

Тиббиёт амалиётида қўлланиладиган дори препаратларининг клиник тадқиқотларини бошлашдан олдин, тадқиқотни ўтказаётган тиббиёт муассасаси ёки тадқиқ этилаётган тиббиёт амалиётида қўлланиладиган дори препаратларини тақдим этган юридик шахс суғурталовчи билан соғлом кўнгилли ёки беморнинг ҳаётига, соғлиғига зарар етказганлик учун фуқаролик жавобгарлигига доир суғурта шартномасини тузиши шарт.

Тиббиёт амалиётида қўлланиладиган дори препаратларининг клиник тадқиқотларини молиялаштириш тадқиқ этилаётган дори препаратларини ёки дори препаратларини тақдим этган юридик шахсларнинг маблағлари ҳисобидан ёхуд қонун ҳужжатларида тақиқланмаган бошқа манбалар ҳисобидан амалга оширилади.

12-модда. Этика экспертизаси

Этика экспертизаси дори препаратларнинг клиник тадқиқотларини ўтказишнинг этика жиҳатидан асосланганлиги тўғрисида хулоса бериш мақсадида ўтказилади.

Этика экспертизаси жамоатчилик асосида фаолият юритувчи Этика қўмитаси томонидан ўтказилади, унинг таркибига тиббиёт, илмий-тадқиқот ташкилотларининг, олий таълим муассасаларининг, оммавий ахборот воситаларининг, нодавлат нотижорат ташкилотларининг ва фуқаролик жамияти бошқа институтларининг вакиллари киритилади.

Этика қўмитасининг мутахассислари ҳеч қандай тарзда тиббиёт амалиётида қўлланиладиган дори препаратларини ишлаб чиқарувчиларга ва этика экспертиза натижаларидан манфаатдор бўлган бошқа шахсларга боғлиқ бўлмасликлари керак.

Этика қўмитаси тўғрисидаги низом ва унинг таркиби ва иш тартиби Ўзбекистон Республикаси Соғлиқни сақлаш вазирлиги томонидан тасдиқланади.        

13-модда. Дори воситаларини ва тиббий буюмларни давлат рўйхатидан ўтказиш

Дори воситаларининг ва тиббий буюмларнинг тиббиёт амалиётида қўлланилишига, қоида тариқасида, улар давлат рўйхатидан ўтказилганидан кейин рухсат этилади.

Қуйидагилар давлат рўйхатидан ўтказилиши керак:

дори препаратлари;

Ўзбекистон Республикасида рўйхатдан ўтказилган дори препаратларининг янги комбинациялари;

илгари Ўзбекистон Республикасида рўйхатдан ўтказилган, лекин бошқача дори шаклларида, дозаларда ёки бошқа ишлаб чиқарувчи томонидан ишлаб чиқарилган дори препаратлари;

тиббий буюмлар;

Дори воситаларини ва тиббий буюмларни давлат рўйхатидан ўтказиш Ўзбекистон Республикаси Соғлиқни сақлаш вазирлиги ҳузуридаги фармацевтика тармоғини ривожлантириш агентлиги томонидан амалга оширилади.

Рўйхатдан ўтказилган дори воситалари ва тиббий буюмлар Тиббиёт амалиётида қўлланилишига рухсат этилган дори воситалари ва тиббий буюмлар давлат реестрига киритилади.

Таркибида турли дори моддалари бўлган дори препаратларини бир хилдаги савдо номи остида давлат рўйхатидан ўтказишга йўл қўйилмайди. Халқаро патентланмаган номдаги савдо номдагилар бундан мустасно.

Дори препаратларини ишлаб чиқариш ва тайёрлаш учун ишлатиладиган фармацевтик субстанциялар, шунингдек дорихоналарда тайёрланадиган дори воситалари ва тиббий буюмлар давлат рўйхатидан ўтказилмайди.

Дори воситаларини ва тиббий буюмларни давлат рўйхатидан ўтказиш натижаларига кўра амал қилиш муддати беш йил бўлган тегишли рўйхатдан ўтказилганлик гувоҳномаси берилади.

Рўйхатдан ўтказилганлик гувоҳномасининг амал қилиш муддати рўйхатдан ўтказилганлик гувоҳномаси эгасининг зарур ҳужжатлар илова қилинган аризасига кўра узайтирилиши мумкин. Рўйхатдан ўтказилганлик гувоҳномасининг амал қилиш муддатини узайтириш тўғрисидаги ариза ушбу гувоҳноманинг амал қилиш муддати тугашидан олдин уч ой ичида берилиши керак. Рўйхатдан ўтказилганлик гувоҳномасининг амал қилиш муддатини узайтириш рўйхатдан ўтказилганлик гувоҳномасини бериш учун назарда тутилган тартибда амалга оширилади.

Рўйхатдан ўтказилганлик гувоҳномасининг амал қилиш муддати ўтгач дори воситаларини ва тиббий буюмларни реализация қилишга ҳамда тиббиёт амалиётида қўллашга, агар улар рўйхатдан ўтказилганлик гувоҳномасининг амал қилиши даврида ишлаб чиқарилган бўлса, рухсат этилади.

Рўйхатдан ўтказилганлик гувоҳномасининг эгаси дори воситасининг ва тиббий буюмнинг хавфсизлигига, сифатига ҳамда самарадорлигига тааллуқли янги маълумотлар тўғрисида Ўзбекистон Республикаси Соғлиқни сақлаш вазирлигини ҳузуридаги фармацевтика тармоғини ривожлантириш агентлигини хабардор қилиши шарт.

14-модда. Фармакологик назорат

Фармакологик назорат дори воситасидан унинг қўлланилишига доир йўриқномага мувофиқ фойдаланилганда одамда кузатиладиган, организм учун бехосдан ва нохуш таъсир кўрсатадиган ножўя реакцияларни аниқлашга, баҳолашга ва уларнинг олдини олишга қаратилган тизимли фаолиятдир.

Рўйхатдан ўтказилганлик гувоҳномасининг, даволаш профилактика муассасалари зарур фармакологик назорат амалиёти (GVP) талабларига мувофиқ фармакологик назорат тизимини ташкил қилиши ва ўрнатилган тартибда ваколатли орган томонидан сертифкатлаштирилиши шарт.

даволаш-профилактика муассасалари, дорихоналар ҳамда дори препаратларини ишлаб чиқарувчи, реализация қилувчи ташкилотлар дори препаратларини қўлланилиши чоғида ножўя реакциялар аниқланган барча ҳолатлар тўғрисида Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлигини ёзма шаклда хабардор қилиши шарт.

Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги дори препаратларининг қўлланилиши чоғида аниқланган ножўя реакцияларга баҳо беради, баҳолаш жараёнида ножўя реакциянинг клиник кўринишлари ва дори препаратининг қўлланилиши ўртасидаги сабаб-оқибат боғланишлари, шунингдек кутилаётган фойданинг дори препаратлари қўлланилишининг эҳтимол тутилган хавфига нисбати аниқланади.

Кутилаётган фойданинг дори воситалари қўлланилишининг эҳтимол тутилган хавфига нисбатининг ўзгаришига таъсир этувчи фактлар аниқланган тақдирда рўйхатдан ўтказилганлик гувоҳномасининг эгаси салбий оқибатларни бартараф этишга, одамнинг ҳаётига ёки соғлиғига зарар етказилишининг олдини олишга, бундай дори препаратларининг қўлланилишидан муҳофаза қилишга қаратилган чора-тадбирларни кўриши шарт.

Дори препарати қўлланилганда унинг “фойда-хавф” нисбати салбийлигига шубҳа уйғонганида (кутилаётган фойданинг дори воситалари қўлланилишининг эҳтимол тутилган хавфига нисбатининг ўзгаришига таъсир этувчи фактлар аниқланган тақдирда) Ўзбекистон Республикаси Соғлиқни сақлаш вазирлиги Фармацевтика тармоғини ривожлантириш агентлиги бундай дори воситасини препаратини муомаладан чиқариш ёки унинг қўлланилишини тўхтатиб туриш тўғрисидаги қарор қабул қилади.

15-модда. Дори воситалари, тиббий буюмлар тўғрисидаги ахборот ва дори воситаларининг рекламаси

Тиббиёт амалиётида қўлланилишига рухсат этилган дори воситалари ва тиббий буюмлар давлат реестрида, кам учрайдиган касалликларни даволаш учун мўлжалланган Орфан препаратлар ва тиббий буюмлар рўйхатида, Рецептсиз бериладиган дори воситалари рўйхатида, Асосий дори воситалари рўйхатида, шунингдек Тиббий буюмлар рўйхатида кўрсатилган ахборот Соғлиқни сақлаш вазирлиги ҳамда Соғлиқни сақлаш вазирлиги ҳузуридаги Фармацевтика тармоғини ривожлантириш агентлигининг расмий веб-сайтига жойлаштирилади.

Рецептсиз бериладиган дори воситалари тўғрисидаги ахборот оммавий ахборот воситаларида, шунингдек ихтисослаштирилган босма нашрларда, дори воситаларининг тиббиётда қўлланилишига доир йўриқномаларда берилиши мумкин.

Рецепт бўйича бериладиган дори воситалари тўғрисидаги ва тиббий буюмлар ҳақидаги ахборот фақат тиббиёт ва фармацевтика ходимлари учун мўлжалланган ихтисослаштирилган босма нашрларда, дори воситаларининг ва тиббий буюмларнинг тиббиётда қўлланилишига доир йўриқномаларда берилади.

Дори воситаларининг рекламаси қонун ҳужжатларида белгиланган тартибда амалга оширилади.

4-боб. Фармацевтика фаолияти

16-модда. Фармацевтика фаолиятининг йўналишлари

Фармацевтика фаолиятининг йўналишлари қуйидагилардан иборат:

дори воситаларини ва тиббий буюмларни яратиш бўйича илмий-тадқиқот ишлари;

дори воситаларини ва тиббий буюмларни ишлаб чиқариш;

дори воситаларининг ва тиббий буюмларнинг сифатини назорат қилиш;

дори воситаларини ва тиббий буюмларни улгуржи реализация қилиш;

дори воситаларини ва тиббий буюмларни чакана реализация қилиш;

дори воситаларини ва тиббий буюмларни тайёрлаш;

доривор ўсимлик хом ашёсини қадоқлаш ва улгуржи реализация қилиш.

17-модда. Фармацевтика фаолиятини амалга ошириш

Фармацевтика фаолияти белгиланган тартибда қуйидаги фаолиятларга бериладиган лицензия асосида амалга оширилади:

дори воситаларини ишлаб чиқариш;

дори воситаларини улгуржи реализация қилиш;

дори воситаларини чакана реализация қилиш;

дори воситаларини тайёрлаш;

доривор ўсимлик хом ашёсини қадоқлаш ва улгуржи реализация қилиш.

Фармацевтика фаолиятини амалга ошириш учун лицензия беш йил муддатга берилади. Лицензия фақат лицензия даъвогарининг аризасига кўра беш йилдан кам муддатга ёки ижара шартномаси муддатига қадар берилиши мумкин. Лицензиянинг амал қилиш муддати лицензиатнинг аризасига кўра узайтирилиши мумкин.

18-модда. Дори воситаларини ва тиббий буюмларни яратиш бўйича илмий-тадқиқот ишлари

Дори воситаларини ва тиббий буюмларни яратиш бўйича илмий-тадқиқот ишлари, қоида тариқасида, илмий-тадқиқот ташкилотлари ҳамда дори воситалари ва тиббий буюмлар ишлаб чиқарувчилар томонидан амалга оширилади.

Дори воситаларини яратиш бўйича илмий-тадқиқот ишлари янги дори воситаларни излашни, кейинчалик уларнинг хоссаларини ўрганишни, фармакологик воситаларнинг ёки дори воситаларининг таркибини ишлаб чиқишни, дори моддаларини (субстанцияларни) ва дори воситаларини ишлаб чиқариш технологияларини ишлаб чиқишни, зарур лаборатория амалиёти (GLP) талабларига мувофиқ клиник олди тадқиқотларни ўтказишни, фармакологик воситаларнинг ёки дори воситаларининг хавфсизлигига, сифатига ва уларнинг сифатини назорат қилиш усулларига доир талаблар кўрсатилган норматив ҳужжатларни тайёрлашни ўз ичига олади.

Тиббий буюмларни яратиш бўйича илмий-тадқиқот ишлари тиббий буюмларнинг янги турларини излашни, кейинчалик уларнинг техник хусусиятларини ўрганишни, ишлаб чиқариш технологияларини ишлаб чиқишни, тиббий буюмларнинг хавфсизлигига, сифатига ва уларнинг сифатини назорат қилиш усулларига доир талаблар кўрсатилган норматив ҳужжатларни тайёрлашни ўз ичига олади.

19-модда. Дори воситаларини ва тиббий буюмларни ишлаб чиқариш

Дори воситаларини ва тиббий буюмларни ишлаб чиқариш уларни ишлаб чиқаришни ҳамда уларнинг сифатини назорат қилишни ташкил этиш қоидаларига мувофиқ серияли ишлаб чиқаришдан иборат бўлиб, у тўлиқ технологик цикл бўйича ёки унинг алоҳида босқичлари бўйича ишлаб чиқаришни ўз ичига олади.

Қалбакилаштирилган, Ўзбекистон Республикасида рўйхатдан ўтказилмаган дори воситаларини ва тиббий буюмларни, шунингдек Ўзбекистон Республикасида рўйхатдан ўтказилган дори воситаларининг ғайриқонуний нусхаларини ишлаб чиқариш тақиқланади.

Давлат рўйхатидан ўтказиш, экспорт, илмий-тадқиқот ишлари, клиник олди тадқиқотлар ва клиник тадқиқотлар ўтказиш учун мўлжалланган дори воситаларини ва тиббий буюмларни ишлаб чиқариш уларни давлат рўйхатидан ўтказмасдан амалга оширилиши мумкин.

Дори воситаларини ва тиббий буюмларни ишлаб чиқарувчилар дори воситалари ва тиббий буюмларнинг сифатини назорат қилувчи ички идоравий хизматларга эга ҳамда зарур ишлаб чиқариш амалиёти (GMP) талабларига мувофиқ бўлиши керак.

Дори воситаларини ва тиббий буюмларни тамғалаш ҳамда жойлаш-ўраш қоидалари Ўзбекистон Республикаси Соғлиқни сақлаш вазирлиги ҳузуридаги фармацевтика тармоғини ривожлантириш Агентлиги томонидан тасдиқланади.

20-модда. Дори воситаларини ва тиббий буюмларни улгуржи реализация қилиш

Дори воситаларини ва тиббий буюмларни улгуржи реализация қилиш фармацевтика фаолиятини амалга ошириш учун тегишли лицензияга эга бўлган дори воситалари ва тиббий буюмлар ишлаб чиқарувчилар ҳамда дори воситаларини ва тиббий буюмларни улгуржи реализация қилувчи ташкилотлар томонидан зарур дистрибьюторлик амалиёти (GDP) талабларига мувофиқ амалга оширилади.

Дори воситаларини ва тиббий буюмларни улгуржи реализация қилувчи ташкилотлар дори воситаларини ва тиббий буюмларни дори воситалари ва тиббий буюмлар ишлаб чиқарувчилардан, дори воситаларини ва тиббий буюмларни улгуржи реализация қилувчи бошқа ташкилотлардан, шунингдек дори воситаларини ва тиббий буюмларни чет эллик ишлаб чиқарувчилардан ҳамда улгуржи реализация қилувчи ташкилотлардан харид қилиш ҳуқуқига эга.

Дори воситаларини ва тиббий буюмларни улгуржи реализация қилувчи ташкилотлар дори воситаларини ва тиббий буюмларни фармацевтика фаолиятини амалга ошириш учун лицензияга эга бўлган ташкилотларга, тиббиёт ташкилотларига, шунингдек дори воситаларидан ва тиббий буюмлардан тиббиётда қўллаш мақсадида ўз эҳтиёжлари учун фойдаланувчи ташкилотларга реализация қилиш ҳуқуқига эга.

Дори воситаларини ва тиббий буюмларни улгуржи реализация қилувчи ташкилотларнинг омборхона бинолари санитария қоидалари, нормалари ва гигиена нормативлари талабларига жавоб бериши керак.

Дори воситаларини ва тиббий буюмларни улгуржи реализация қилувчи ташкилотларнинг омборхона мудири фармацевтик маълумотга эга бўлиши керак.

Сифатсиз, қалбакилаштирилган, Ўзбекистон Республикасида рўйхатдан ўтказилмаган дори воситаларини ва тиббий буюмларни, шунингдек Ўзбекистон Республикасида рўйхатдан ўтказилган дори воситаларининг ғайриқонуний нусхаларини харид қилиш ҳамда улгуржи реализация қилиш тақиқланади.

Дори воситаларини ва тиббий буюмларни улгуржи реализация қилиш Ўзбекистон Республикаси Вазирлар Маҳкамаси томонидан белгиланган тартибда амалга оширилади.

21-модда. Дори воситаларини ва тиббий буюмларни чакана реализация қилиш

Дори воситаларини ва тиббий буюмларни чакана реализация қилиш фақат дорихоналар ҳамда уларнинг филиаллари томонидан амалга оширилади.

Дори воситаларини чакана реализация қилиш Ўзбекистон Республикаси Соғлиқни сақлаш вазирлиги томонидан тасдиқланадиган шаклдаги рецептлар бўйича ёки тасдиқланган Рецептсиз бериладиган дори воситаларининг рўйхатига кўра рецептсиз амалга оширилади.

Ўзбекистон Республикасида рўйхатдан ўтказилган ёки дорихоналар томонидан тайёрланган дори воситаларини ва тиббий буюмларни чакана реализация қилишга рухсат берилади.

Сифатсиз, қалбакилаштирилган, Ўзбекистон Республикасида рўйхатдан ўтказилмаган дори воситаларини ва тиббий буюмларни, шунингдек Ўзбекистон Республикасида рўйхатдан ўтказилган дори воситаларининг ғайриқонуний нусхаларини харид қилиш, чакана реализация қилиш ҳамда улардан фойдаланиш тақиқланади.

Дори воситаларини ва тиббий буюмларни чакана реализация қилиш Ўзбекистон Республикаси Вазирлар Маҳкамаси томонидан белгиланадиган тартибда амалга оширилади.

22-модда. Дорихона

Дорихона – ихтисослаштирилган бино ва жихозлар комплекси бўлиб, дори воситаларини ва тиббий буюмларни чакана реализация қилишни, шунингдек уларни тайёрлашни амалга ошириш учун тегишли лицензияга эга бўлган юридик шахс шаклида ёки юридик шахснинг таркибий бўлинмаси шаклида ташкил этилиши мумкин. Дорихоналарнинг филиаллари, даволаш-профилактика муассасаларининг дорихоналари ҳам дорихоналар жумласига киради.

Дорихоналар санитария ва гигиена ашёларини, шифобахш озиқлантириш маҳсулотларини, маъданли сувларни, шунингдек даволаш-косметика маҳсулотларини, биологик фаол қўшимчаларни реализация қилишни уларнинг қўлланилиши ва реализация қилиниши учун тегишли ҳужжатлар мавжуд бўлган тақдирда амалга ошириши мумкин.

Дорихона мудири олий фармацевтик маълумотга эга бўлиши керак.

Дорихона филиалининг мудири фармацевтик маълумотга эга бўлиши керак.

Дори воситаларини ва тиббий буюмларни тайёрлаш, бериш, реализация қилиш қоидаларига ва уларнинг сифатини таъминловчи сақлаш шароитларига дорихоналар томонидан риоя этилиши керак.

Дорихоналар зарур дорихона амалиёти (GPP) талабларига, санитария қоидалари, нормалари ва гигиена нормативлари талабларига жавоб бериши керак.

23-модда. Дорихоналарда дори воситаларини ва тиббий буюмларни тайёрлаш

Дори воситалари дорихоналарда Ўзбекистон Республикаси Соғлиқни сақлаш вазирлиги ҳузуридаги фармацевтика тармоғини ривожлантириш Агентлиги томонидан қўлланилишига рухсат этилган фармацевтик субстанциялардан тайёрланади.

Ўзбекистон Республикаси Соғлиқни сақлаш вазирлиги томонидан тасдиқланадиган Тайёрлашга рухсат этилган дори воситалари рўйхатига киритилмаган дори воситаларини тайёрлаш тақиқланади.

Дори воситаларини ва тиббий буюмларни тайёрлаш, шунингдек уларни сақлаш, уларнинг сифатини назорат қилиш ҳамда уларни расмийлаштириш Ўзбекистон Республикаси Соғлиқни сақлаш вазирлиги ҳузуридаги фармацевтика тармоғини ривожлантириш агентлиги белгилайдиган тартибда дорихоналар томонидан амалга оширилади.

24-модда. Дори воситаларини, тиббий буюмларни сақлаш, ташиш ҳамда йўқ қилиб ташлаш

Фармацевтика фаолиятини амалга ошириш учун лицензияга эга бўлган ташкилотларга, тиббиёт ташкилотларига, шунингдек дори воситаларидан ва тиббий буюмлардан тиббиётда қўллаш мақсадида ўз эҳтиёжлари учун фойдаланувчи ташкилотларга дори воситаларини ва тиббий буюмларни сақлашга рухсат берилади.

Дори воситаларини ва тиббий буюмларни сақлаш ҳамда ташиш уларнинг хавфсизлиги, сифати ва бут сақланиши зарур дистрибьюторлик амалиёти (GDP) ёки зарур сақлаш амалиёти (GSP) ёки яхши дорихона амалиёти (GРP) талабларига мувофиқ амалга оширилиши керак.

Сифатсиз, қалбакилаштирилган, Ўзбекистон Республикасида рўйхатдан ўтказилмаган дори воситаларини ва тиббий буюмларни, шунингдек Ўзбекистон Республикасида рўйхатдан ўтказилган дори воситаларининг ғайриқонуний нусхаларини реализация қилиш мақсадида сақлаш, ташиш тақиқланади.

Сифатсиз, қалбакилаштирилган, Ўзбекистон Республикасида рўйхатдан ўтказилмаган дори воситалари ва тиббий буюмлар, Ўзбекистон Республикасида рўйхатдан ўтказилган дори воситаларининг ғайриқонуний нусхалари, шунингдек муомаладаги дори воситалари ва тиббий буюмлар уларнинг инсон соғлиғига зарарли таъсирини тасдиқловчи фактлар аниқланган тақдирда, Ўзбекистон Республикаси Вазирлар Маҳкамаси томонидан белгиланадиган тартибда муомаладан чиқарилиши ва йўқ қилиб ташланиши керак.

Дори воситаларини ва тиббий буюмларни йўқ қилиб ташлаш уларнинг эгалари маблағлари ҳисобидан амалга оширилади.

5-боб. Дори воситаларини ва тиббий буюмларни экспорт ва импорт қилиш, олиб кириш ҳамда олиб чиқиш

25-модда. Дори воситаларини ва тиббий буюмларни экспорт ва импорт қилиш

Дори воситаларини ва тиббий буюмларни экспорт ва импорт қилиш, шу жумладан илмий-тадқиқот ишлари, клиник олди тадқиқотлар, клиник тадқиқотлар ўтказиш ва давлат рўйхатидан ўтказиш, кўргазмаларда, ярмаркаларда, халқаро анжуманларда намойиш этиш учун мўлжалланган дори воситаларини ва тиббий буюмларни экспорт ва импорт қилиш қонун ҳужжатларида белгиланган тартибда амалга оширилади.

Сифатсиз, қалбакилаштирилган, Ўзбекистон Республикасида рўйхатдан ўтказилмаган дори воситаларини ва тиббий буюмларни, шунингдек Ўзбекистон Республикасида рўйхатдан ўтказилган дори воситаларининг ғайриқонуний нусхаларини импорт қилиш тақиқланади.

Орфан дори препаратларини ва тиббий буюмларни импорт қилиш давлат рўйхатидан ўтказилмасдан амалга оширилиши мумкин.

26-модда. Дори воситаларини ва тиббий буюмларни жисмоний шахслар томонидан шахсий фойдаланиш учун олиб кириш ҳамда олиб чиқиш

Дори воситаларини ва тиббий буюмларни қуйидаги ҳолларда давлат рўйхатидан ўтказмасдан ҳамда божхона расмийлаштирувисиз олиб кириш ва олиб чиқишга рухсат берилади, агар улар:

мамлакатда бўлиш даврида жисмоний шахслар томонидан шахсий фойдаланиш учун мўлжалланган бўлса;

Ўзбекистон Республикаси ҳудудида ва унинг ҳудудидан ташқарида яшаб турган беморни даволаш-профилактика муассасаси томонидан тасдиқланган тиббий кўрсатма асосида, даволаш курси доирасида даволаш учун мўлжалланган бўлса;

дипломатик ваколатхоналарнинг ва уларга тенглаштирилган ваколатхоналарнинг дипломатик ҳамда маъмурий-техник ходимлари, шу жумладан улар билан бирга яшаб турган оила аъзоларининг шахсий фойдаланиши учун мўлжалланган бўлса;

Ўзбекистон Республикаси ҳудудига кириб келаётган ёки унинг ҳудудидан чиқиб кетаётган транспорт воситасининг йўловчиларига биринчи тиббий ёрдам кўрсатиш учун мўлжалланган ва тиббий дорилар қутичаси таркибига киритилган бўлса.

Халқаро илмий, маданий, спорт тадбирларининг иштирокчиларини ҳамда халқаро экспедицияларнинг иштирокчиларини даволаш учун мўлжалланган дори воситаларини ва тиббий буюмларни олиб кириш ҳамда олиб чиқиш Ўзбекистон Республикаси Вазирлар Маҳкамаси томонидан белгиланадиган тартибда амалга оширилади.

 

6-боб. Якунловчи қоидалар

27-модда. Низоларни ҳал этиш

Дори воситалари, тиббий буюмлар ва фармацевтика фаолияти соҳасидаги низолар қонун ҳужжатларида белгиланган тартибда ҳал этилади.

28-модда. Дори воситалари, тиббий буюмлар ва фармацевтика фаолияти тўғрисидаги қонун ҳужжатларини бузганлик учун жавобгарлик

Дори воситалари, тиббий буюмлар ва фармацевтика фаолияти тўғрисидаги қонун ҳужжатларини бузганликда айбдор шахслар белгиланган тартибда жавобгар бўлади.

 

Umumiy takliflar: 11

926